Зохиолч: ПОЛЬ ДЕ КРАЙФ
Орчуулагч: Д. Дандий Ш. Гаадамба
Ангилал: Америк уран зохиол Эрүүл мэнд, анагаах ухаан Түүх Байгалийн шинжлэл Намтар, дурсамж
Хэвлэлийн газар: Тодорхойгүй
«Левенгук нас барав... Энэ бол шинжлэх ухаанд хүнд цохилт, нөхөж болшгүй гарз болов. Одоо бичил амьтныг судлах ажлыг хэн эрхлэх бил ээ?» гэж Английн вангийн нийгэмлэгийн эрдэмт эрс бие биеэсээ асууж байлаа. Реомюр ч Парисын цуутай Академийн хамтаар мөн ийнхүү асууж байв. Тэгтэл энэ асуудлын хариу төдий л удалгүй гарч ирснийг өгүүлбэл Дельфт хотын эцэж цуцахыг мэддэггүй хаалгачин нүд аньж, түүний шинжлэлийн шургуу ажил 1723 онд цэглэсний дараагаар түүнээс мянган модны хол газар Умард Италийн Скандианод нянгийн шинэ ангуучин мэндлэв. Левенгукийн хойчийг залгамжлагч энэ хүн бол Спалланцани овогтой Лазаро бөлгөө. Бага насандаа шавраар элдэв дүрс шавж хийхдээ амандаа шүлэг гиншин, хийсэн дүрсээ цох, хачиг, ялаа, чийгийн өт тэргүүтнийг элдэвлэн зовоож туршихдаа хэрэглэдэг сонин этгээд хүү байжээ. Томчуулд элдэв асуулт тавин улиглахын оронд амьд амьтныг биетэй бодтой дээр нь судалж, сарвуу далавчийг тастан эргүүлж байранд нь тогтоохыг оролддог байв. Эдгээр амьтдын чухам юу болохыг төдийлөн сонирхохгүй атал тэдгээрийн биеийн бүтэц хэрхэн хөдөлдөг тэргүүтнийг тодруулах нь түүнд илүү чухал байжээ.
Энэ залуу итали хүн өрх гэрийнхнийхээ хүсэл зоригийн эсрэг нянгийн ангуучин болох гэж багагүй үзэлцэн тэмцэхэд хүрсэн билээ...
