Зохиолч: Гүи Де Мопассан
Орчуулагч: Д. Лодойдамба
Ангилал: Францын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Тэр хүн газар сайгүй ажил эрсээр дөчин өдөр явчихлаа. Тэгээд ажил олдохгүй болохоор нь Ламанш муж дахь төрөлх нутаг Виль-Аварэгээ орхиж явжээ. Туслах мужаан, хорин долоон настай, ажилсаг, төв шударга энэ том хүү хоёр сарын турш гэр бүлийнхнийхээ хөлс хүчээр амьдран суужээ. Ер нь ажилгүйчүүд олон байсан болохоор чийрэг гараа зөрүүлэн зүгээр суусаар байтал юу ч олдохоо больжээ. Тэдний гэрт талх ховорхон үзэгддэг байсан бөгөөд хоёр бүсгүй дүү нь өдрийн ажил хийдэг боловч цалин хөлс нь бага байв. Харин хамгийн эрүүл чийрэг өнөөх Жак Рандель л хийх юм юу ч олдохгүй болохоор зөв зүгээр гэртээ суугаад бусдынхаа олсныг цөлмөж суудаг болжээ.
Нутгийн захиргаанаас ажил сураглавал төв францад ажил олдож магадгүй гэж нарийн бичгийн дарга нь хэлэв. За ингээд мань эр бичиг баримтаа цэгцэлж, хармаандаа долоон франк хийж аваад, өмд цамцаа, хос шаахайтайгаа хөх цэнхэр вааданд зангидаж, савааны үзүүрт өлгөж мөрөн дээрээ тавьчхаад аян замд гарч одов...
