Зохиолч: П. П. Бажов
Орчуулагч: У. Дамдинсүрэн
Ангилал: Үлгэр, домог Оросын уран зохиол
Хэвлэлийн газар: Улсын хэвлэлийн газар
Катя, Данилыг Зэст уулын эзэгтэйгээс буцааж айл болон аж төрж, олон хүүхэд төрүүлжээ. Найман хүүхэд нь цөм хүү ажээ. Ганц охин гарах нь яагаа вэ дээ гэж эх нь байн байн уйлдаг байв. Эцэг нь:
— Чи бид хоёр ийм л хувьтай улс байж дээ гэж инээж суудаг байжээ.
Хөвгүүд нь энх тунх өсөж торнилоо. Нэг нь харин үүдний шатан дээрээс ч юм уу, өөр нэг юман дээрээс унаж бэртээд бөгтөр болсон ажээ. Бариач нар барьж оролдоод ч тус болсонгүй, нэг насаараа нарт хорвоод зовлонгоо үзэхээс аргагүй болжээ.
Тахир дутуу болсон хүүхэд голцуу ууртай догшин хүн болдгийг би ажигласан билээ. Гэтэл энэ хүү наргиан шуугиантай өсөж, юмны учир олдог уран хүн болов...
