— Урьд бид ямар байв аа? Энэрч хайрлаж байгаа нь энэ гээд харийн этгээдийг өөрийн хүнтэй адил үзэж, ингэснээр үндэс угсаа, ёс суртахуунаа умартан будилж мунгинаж явсан үеийг түүх мартахгүй! Өнөө харин юм өөр болжээ. Бүгдийг тэгш үзэх тэрхүү эх оронч бус үзлийн хамаг хор үндэс тасарч, үймээн самуун дэгдээгчдийн хүч гаднаас цохигдож, дотроосоо ялзарч, бид европын болон дэлхийн хамгийн ажилсаг, хамгийн хүчирхэг ард түмэн гэгдэж, бүх германчуул ганц намд нэгдэх өдөр холгүй боллоо. Энэ хэний ач гавьяа вэ гэвэл гагцхүү тэр их хүнийх: Тэр хүн эгэл биднийг нойрноос сэрээсний ачаар бид номой бүрэг амьтад байхаа больж, хорвоо ертөнцөд эзэн суух тавилантай шигшмэл хүмүүс гэж өөрсдийгөө таньж авлаа!

— Эзэн хаантан минь германы ард түмэн та биднийг ийн гийгүүлэн соёрхож байхад бид түүндээ дээр дор, баян хоосон гэлгүй цөмөөрөө туслах учиртай, нийтийн эгнээнээс нэг ч хүн сугаран хоцорч үл болно! гэж цээжээр хашхираад сая л нооргоо харан ажилч хичээнгүй өндөр ёс суртахуунтай чанараараа ертөнцийг бишрүүлж, бидэнтэй өрсөлдөхийг зориглосон болгоныг хүү татаж, бут ниргэх хүчирхэг зэр зэвсгээ агссан цагтаа л бид аль ч тив, ямар ч үндэстнийхтэй харьцуулж үл болом чансаатай, германы эзэн дээдсийн соёлыг цэцэглүүлэн хөгжүүлж чадах юм аа! гэв.

Сэтгэл нь цэрвэж буй алчуураас дутуугүй хөнгөрсөн Дидерих, ахин хүч аван:

— Тиймэрхүү хосгүй, хэзээ ч үзэгдээгүй хөгжил цэцэглэлтийг ялзарсан, үлбэгэр энх тайван бидэнд өгч чадахгүй! Зорьсондоо хүрье гэвэл бидэнд дайн хэрэгтэй! Амьд сэрүүн байсан бол эдүгээ зуун настайгаа золгох байсан агуу их хүн: «Германы алтны чанарыг галд хийж л шалгах хэрэгтэй» гэж айлтгасан билээ...