Зохиолч: Эрнест Хемингуэй
Орчуулагч: Д. Алтанхуяг
Ангилал: Америк уран зохиол
Хэвлэлийн газар: Улсын хэвлэлийн газар
Линкольны нэрэмжит батальон Харамын өндөрлөгийг дөрвөн сар хагасын турш хамгаалсан тэр үеэс хойш даруй хоёр жил өнгөрч тэнд нөгчсөн америкчуудын түрүүч эдүгээ Испани нутгийн шороонд уусан шингэжээ.
Энэ шөнө нөгчигсөд Испанийн хүйтэн шороонд нойрсон байх бөгөөд газар дэлхий тэдэнтэй тэврэлдэн унтахуй дор хүйтэн өвлийг үднэ. Гэвч хавар болоход хур бороо шаагин газар дэлхий сэргэн амилна. Өмнийн салхин толгодын зүг намуухнаар үлээнэ. Өгөршин харласан модод гөлөглөн ногоорч Харама голын дэнжид алимын модод цэцэглэнэ. Нөгчигсөд газар дэлхий амилан сэргэж буйг хавар цагт л мэднэ.
Юу гэвэл тэд Испанийн газар шороонд уусан шингэсэн бөгөөд энэхүү газар шороо үеийн үед мөнх буюу. Газар шороо өвөл бүр таг чиг нойрсон буй мэт санагдавч хавар бүр сэргэн цэцэглэмүй. Нөгчигсөд маань үүрд амьд бүлгээ...
