Зохиолч: Хатгин Ц. Дамдинсүрэн
Орчуулагч:
Ангилал: Монголын уран зохиол Аман зохиол
Хэвлэлийн газар: Интерпресс
Монгол ардын аман зохиол маш эртнээс үүсжээ. Хэдэн мянган жилийн дотор Монголын ард түмэн элдэв үлгэр, ерөөл, оньсого, цэцэн үг зэргийг зохиож хэлэлцсээр иржээ. Ардын дундаас гарсан билигтэн хүн, мэргэжилтэй үлгэрч, хуурч болдог байв. Тэдний гайхамшигт баатрын үлгэр тууль, чимээ аниргүй аглаг хээрийн дунд байгаа малчны эсгий гэрт морин толгойтой хялгасан хуур товшуурын аялгуутай хосолж яруу сайхнаар сонсогддог байв.
Ард олон бичиг мэдэхгүй, сонирхон унших уран зохиол ч үгүй байхад, тэдний хамаг анхаарал сонирхлыг гагцхүү ардын үлгэрч, туульч, хуурч хангадаг билээ. Тэгээд эдгээр үлгэрч, туульч, хуурч, ерөөлч нар зөвхөн ямар нэгэн сонирхолтой явдлыг яригч төдий биш, монгол ардын сэтгэлийн гүн эрмэлзлэгийг илэрхийлэн гаргагч, олны хүслийг уран үгээр илэрхийлэн тунхаглагч хүн байна. Ийм учраас ард олон, өөрийн хуурч, үлгэрч, туульч нарт их хайртай байдаг.
