Зохиолч: М. Горький
Орчуулагч: Я. Аюурзанаев
Ангилал: Оросын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Яармагийн оргилсон хөгжөөн хөдөлгөөнт өдрүүдийг санахад Петр Артамонов гайхахаар барахгүй бараг аймаар байв. Санаанд нь орж байгаа энэ бүхнийг биеэрээ үзэх байтугай, хашхиралдаан шуугиан, дуу хөгжмийн нижигнээн, согтуугийн хөөрлөх, дуулах, хашхирах чимээ, зүрх сэтгэл шимшрүүлэх галзуу хүмүүсийн гунигт орилооноор бялхсан асар том чулуун тогоон дотор биеэр орж буцалж байсан гэж бодоход үнэмших аргагүй байв. Буржгар үстэй толгой дээрээ домбон бүрх малгай тавьж, сюртук өмссөн нэг лут том эр энэ бүхнийг буцалгаж хутгаж байлаа. Сахал самбайгаа хуссан хөх бор нүүр дээр нь ууль шувууных шиг хоёр том дүрэлгэр нүд шигдсэн үзэгдэж байж билээ. Энэ хүн бамбагар уруулаа тамшаан Артамоновын тэврэх түлхэх зэргээр аашлан:
— Тэнэг чи дуугүй бай. Энэ бол орос орон загалмай зүүх нь энэ, мэдэв үү? Загалмайн ёслол жил бүр Ижил, Ока мөрөн дээр болдог нь энэ гэж хашхирч байв...
