— Нэг юмыг би мэдэж байна. Энэ бол эхэн үеийн төгсгөл.

Чулуун зэвсгийн үе, хүрэл зэвсгийн үе, төмөр зэвсгийн үе гэж ярьдаг. Бид энэ бүгдэд дэлхий дээгүүр явж үүрээр шувуу жиргэхийг сонсон атаархахдаа уйлах шахаж байсан тэр цагт үе гэж нэгэн нэр өгдөг байсан. Тэр цагийг бид дэлхийн үе буюу, дэлхийн татах хүчний үе гэж нэрлэж болох юм. Сая сая жилийн турш бид дэлхийн татах хүчийг давах гэж оролдож ирсэн. Бид амёба, загас барихдаа өөрсдийнхөө жинд дарагдаж үхэхгүйн тулд далайн уснаас тэмцэн гарсан. Эрэг дээр гарангуутаа бид манай шинэ бүтээл болох сээр нуруугаа жингийн хүчинд хугалуулахгүйн тулд өндийн тэнийхийг эрмэлзэж ирсэн. Бид бүдрэхгүй явж, ойчихгүй гүйж сурсан. Сая сая жил татах хүчин биднийг гэрт минь барьж, салхи, үүл дэвхрэг, цагаан эрвээхэй биднийг даажигнаж ирсэн. Тэгэхлээр өнөөдрийн хамгийн гол зүйл гэвэл бидний хэзээний дагуул татах хүчинд төгсгөл ирж, тэр үеэ нэгэнт дуусгажээ. Шинэ эриний эхийг хэзээнээс тоолохыг мэдэхгүй байна. Нисдэг хивсний тухай мөрөөддөг байсан персүүдийн үеэс юм уу, эсвэл тоолол, цагийн дараа ямар нэг минут, секундээс эхлэх ч юм уу бүү мэд. Ямар ч гэсэн урт бөгөөд хүнд хүчлэлийн эрин төгсөж байна. Сая сая жилийг хүмүүс бид тун амаргүй өнгөрөөсөн...