Зохиолч: Рэй Брэдбери
Орчуулагч: Н. Цэвэгмид
Ангилал: Америк уран зохиол
Хэвлэлийн газар: БНМАУ-ын Ардын боловсролын яамны хэвлэл
Фиорелло Бодони шөнө дараалан сэрж харанхуй тэнгэрт исгэрэн нисэж байгаа пуужингуудыг чагнадаг байжээ. Сайн ханийгаа бөх нойрссоныг мэдмэгц тэр сэмхэн босож өлмийгөөрөө гишгэн гадаа гардаг байжээ. Голын захад байрласан тэдний бяцхан байшингаас өчигдрийн хоол ундны үнэр салхидан гарах гэж байдаггүй тул хэдэн минут ч гэсэн шөнийн цэвэр агаараар амьсгалах гэж гардаг ажээ. Хэдэн минут ч гэсэн сэтгэл зүрхээрээ пуужингийн хойноос тэнгэрт хөөрөх гэж гардаг ажээ.
Энэ шөнө тэр бараг чармаа шалдан харанхуйд зогсон галт оргилуурууд хэрхэн дээшлүүлж байгааг харж байна. Эд бол улаан нүдэн, санчир, цолмоныг зорин алс аялах догшин пуужингууд санжээ.
— За, за Бодони минь...
Бие нь зарсхийв.
Нэг өвгөн чимээгүйхэн жирэлзэх голын бүр эрэг дээр сүүний шилний хайрцаг дээр суугаад ид шөнийн нам гүмд нисэх пуужингуудыг харж суулаа...
