Гетти ярихдаа, намайг сонсох нь лавтай гэсэн янзаар зориуд аяархан дуугарна. Инээх нь тун ховор, инээвэл чонын ярзайсан байдлыг санагдуулдаг гэж би урьд нь уншсан юм. Гэхдээ энэ бол дүр бүтээхдээ уран зохиолын хэтрүүлэг хэрэглэсэн нь байлгүй гэж боддог байлаа. Гэтэл Геттийг инээхтэй зэрэг л хэтрүүлээгүй нь тодорхой юм байна гэж бодогдож билээ.
Тэрбумтантай тун ч товчхон, түргэн зуур ярив.
— Ноён Гетти гуай, та Англид байнга суудаг уу?
— Үгүй ээ. Миний жинхэнэ гэр Америкийн Калифорни муж улсын Лос-Анжелес хотод байдаг. Харин энд, Англид Лондоноос хориод бээрийн газарт Свазерлендийн шилтгээнд миний ажлын өргөө бий. Ажлаасаа болоод би чинь Ойрх Дорнодод ойрхноор нь Европт суухад хүрсэн юм. Ингэх нь миний ажилтнуудад ч, надад ч тохиромжтой юм...
