ДЕКАМЕРОНЫ ЭХНИЙ ӨДӨР ДУУСАЖ
ХОЁР ДАХЬ ӨДӨР ЭХЭЛЖ БАЙНА

Филимоны захиран засагласан эл өдөр олон зүйлийн зовлон бэрхшээлд нэрвэгдсэн хүмүүс явж явж зовлонгоос гэтлэн юм бүхэн санаандгүй сайн сайхнаар дууссан тухай туурийг толилуулна.

Нарны гэрэл байгаль дэлхийг гийгүүлэн ногоон мөчир дээр жигүүртэн шувуу жиргэн донгодож, баясгалант ая дуугаа өргөн шинэ өдөр эхэлснийг түмэнд сонсгон тунхаглаж байх үес долоон бүсгүй, гурван залуу сэрж, цэцэрлэгт ороод шүүдэр унасан зүлэг дээгүүр удтал зугаалж, өнгө бүрийн сайхан цэцэг хэлхэн наадав. Дараа нь юм бүхэн өчигдрийн тогтоосон журмаар орж, өглөөний сэрүүнд цайгаа ууцгааж, бүжиглэн цэнгэж байгаад хэсэг унтаж амарсны дараа гурван цагийн үед босож, хатан хааны зарлигаар ногоон нугад очиж, хатан хаанаа тойрон сууцгаав. Толгой дээрээ лаврын навчин титэм асаасан дур булаам үзэсгэлэн төгс хатан хаан хэсэг зуур бодолхийлэн байснаа цугласан хүмүүсийг нэгэнтээ тойруулан хараад Нейфилийг эхлэн ярь гэж зарлиг буулгасанд Нейфила удаан гуйлгасангүй ярьж эхлэв.

НЭГ : Мартеллино гэгч хүн хуурамчаар тахир доголон болж, Арриго хутагтын шарилд мөргөснөөр даруй эдгэсэн мэт дүр үзүүлж байтал булхай нь илэрч, олон хүн түүнийг баривчлан авч нэвширтэл жанчаад дүүжлэн алахаар завдсан боловч золоор амь мэнд мултарчээ.

ХОЁР : Ринальдо Д’Эсти хамаг юмаа дээрэмдүүлээд Кастель Гвильельмо шилтгээнд хүрсэнд нэгэн бэлэвсэн эхнэр түүнийг асран тэнхрүүлж, алдсан эд юмсыг нөхөн шагнаад Ринальдо орон гэртээ эсэн мэнд буцаж иржээ.

ГУРАВ : Гурван залуу хүн хөрөнгө зөөрөө үрэн таран хийж дуусжээ. Тэдний зээ хүү нь цөхрөнгөө бараад нутаг орондоо буцаж явах зам зуур нэгэн ширээт ламтай танилцаад тэр бол үнэндээ ширээт биш, Английн эзэн вангийн охин болохыг мэдэв. Залуу эр тэр гүнжтэй ханилан сууж, ах нарынхаа хохирлыг нөхөн дүүргэснээр тэд нар дахин баяжив.

ДӨРӨВ : Ландольфо Руфоло үгээгүй ядуугийн туйлд хүрээд далайн дээрэмчин болов. Генуягийнханд баригдаад тэнгист хөлөг онгоц сүйдэх үед үнэт эрдэнэсийн зүйл бүхий хайрцаг дээр хөвөн амь гарч, Корфод нэгэн хүүхнийд толгой хоргодож байгаад дараа нь ихэд баяжин эх нутагтаа эргэж иржээ.

ТАВ : Перужийн Андреуччо гэдэг залуу Неаполь хотод морь худалдан авахаар ирээд нэгэн шөнийн дотор гурван аюулд учирч, гурвуулаас нь мултран бадмаараг эрдэнэ өвөртлөн гэртээ эргэж иржээ.

ЗУРГАА : Беритола гэдэг хүүхнийг хоёр хүүгээ алдаад арал дээр хоёр марал гөрөөстэй байж байхад нь хүн олжээ. Беритолыг Лунижанд очиход хоёр хүүгийн нэг нь тэр нутгийн захирагчийн албанаа хүчин зүтгэх болж, захирагчийн охинд дурласны улмаас шоронд оржээ. Сицили арлынхныг Карл вангийн эсрэг тэмцэн боссоны дараа, явж явж эхийгээ олж уулзсан хүү нь өөрийн эзэн ноёны охинтой ханилан суужээ. Ах нь бас олдож, хоёр хүүгийн урьдын эрхэм нэр зэргийг сэргээсэн байна.

ДОЛОО : Вавилоны султаан охиноо Алгарвын ванд хадамлахаар болж явуулсанд хэд хэдэн цаг бусын учрал тохиолдож дөрвөн жилийн дотор олон газар есөн эрийн өвөр дамжаад эцсийн бүлэгт эцэгтээ охин биеэр эргэн ирж, урьд тогтсон сүй ёсоор Алгарвын вангийн хатан болохоор дахин оджээ.

НАЙМ : Антверпений гүн хилс хэрэгт гүтгэгдэн хоёр хүүхдээ Английн хоёр өөр хотод орхиод буруулан зугтаж амь гарав. Англид биеэ танигдалгүй эргэж ирээд хоёр хүүхдээ өөдтэй сайн явааг мэдэж, Францын ван эзний цэргийн агтчинаар ажиллах болов. Гүнгийн гэм буруугүй нь нотлогдсоны дараа түүний бүх эрх ямбыг сэргээжээ.

ЕС : Амброжолод маллуулж мэхлэгдсэн Генуя хотын Бернабо гэдэг хүн огт гэм зэмгүй эхнэрээ алах тушаал өгчээ. Эхнэр нь золоор амь мэнд мултарч, эр хүний хувцас өмсөн султаны албанд ороод мэхт этгээдийн Александрид байгааг мэдэж, Бернабог тийш нь дуудан аваачиж, мэхт этгээдийг залхаан цээрлүүлэв. Хүүхэн өөрөө дахин эмэгтэй хүний хувцас өмсөж, нөхөртэйгөө хамт Генуяд эргэж иржээ.

АРАВ : Монакогийн Паганино гэгч мессер Ричардо да Кинзикийн эхнэрийг хулгайлав. Эр нөхөр нь эхнэрийнхээ хаана байгааг мэдэж хойноос нь очоод Паганинотой дотносон нөхөрлөж, эхнэрээ буцааж өгөхийг хүссэнд Паганино хэрэв эхнэр чинь өөрөө зөвшөөрвөл болно гэжээ. Эхнэр нь нөхөртөө эргэж очихыг зөвшөөрсөнгүй, мессер Ричардог нас барсны дараа Паганинотой ханилан суужээ.