ЦАХИМ НОМ

Жорж Санд

(1804—1876)

«Философийн гуйланчлал» гэдэг суут бүтээлдээ К.  Маркс тухайн үеийн тариачдын ядуу зүдүү амьдралын тухай бичихдээ Жорж Сандын «Ян Жижка», «Консуэло» зэрэг романаас эшлэл авчээ.

Жорж Санд хэмээн алдаршсан Францын нэрт зохиолч эмэгтэй Аврора Дюпен Парист шашны сургуульд сурч байхдаа 1832 онд бичсэн «Индиана» зохиолоороо олны танил болжээ.  Тэр өнгөрсөн зууны 30-аад онд анхныхаа зохиолыг нутгийнхаа танил Жюль Сандотой хамтран бичиж, нэрээ нэгтгэж гаргаснаас хойш Жорж Санд гэж нэршжээ.  Ж. Санд эмэгтэйчүүдийн эрх чөлөөний төлөө тэмцэгч байсан бөгөөд О.  Бальзак, Ф.  Шопен, А.  Мицкевич, Г.  Гейне, Ф.  Лист, Г.  Флобер нартай уран бүтээлийн нягт холбоотой ажиллаж байжээ.

Ж.  Сандын ихэнх уран бүтээл эмэгтэйчүүдийн тухай бөгөөд залуу бүсгүйчүүд амьдралынхаа замыг хэрхэн сонгох вэ гэдгээс их зүйл шалтгаалдгийг «Валентина», «Лелия», «Жак» зэрэг томоохон бүтээлдээ нэн тодорхой үзүүлсэн юм.

1834 оноос зохиолчийн үзэл санаанд томхон эргэлт гарсан байна.  Тэрээр романтик баатрынхаа хувиа бодсон байдал бүтэлгүй болохыг ухаарч «Орас» хэмээх роман бичжээ.  1840-өөд оны үед «Тэнэмэл туслах», «Анжибогийн тээрэмчин», «Антуаны үйлдсэн гэм», «Цасан хүн», «Залуу бүсгүйн өчил» зэрэг олон роман туурвисан юм.

Ж.  Санд бол дэлхийн утга зохиолд тодорсон эмэгтэй зохиолчдоос хамгийн олон роман бүтээсэн хүний нэг юм.  Ард түмнээс гаралтай авьяас билигт дуучин бүсгүйн тухай өгүүлсэн түүний «Консуэло», тайж язгуурт бүсгүй өөрийн хайрт хүнтэйгээ адил байхын тулд өв хөрөнгөнөөсөө татгалзаж байгаа тухай «Анжибогийн тээрэмчин» роман, мөн үйлдвэрийн баян эзний хүү үйлдвэрийн хэрэгслийг нийтээр эзэмшсэн чөлөөт нэгдэл байгуулахаар шийдэж байгааг харуулсан «Антуаны үйлдсэн гэм» зэрэг романууд бичжээ.  Эдгээр зохиолдоо эгэл жирийн хөдөлмөрч хүмүүс язгууртан баячуудаас олон талаар давуу болохыг илтгэн харуулсан боловч хөрөнгөтөн, пролетари хоёрын зөрчлийг хувьсгалаар шийдвэрлэх арга замыг ойлгоогүй байна.

Ж.  Сандын уран бүтээлд XIX зууны дунд үеэр Өрнөд Европын дэвшилт утга зохиолд гарч байсан романтик болон уян сэтгэлийн талыг голчилсон урсгалын нөлөө их туссан байдаг юм.

Монголын уншигчид түүний уран бүтээлийг сайн мэддэг бөгөөд хэд хэдэн туурь, «Индиана», «Консуэло» роман нь орчуулагдан гарчээ.

Эх сурвалж: Хүүхэд залуучуудын нэвтэрхий толь-3 (1988) номоос

Зохиолч (орчуулагч)-ийн номууд

Өнөөдөр: 7973
Сүүлийн 7 хоног: 57143
Сүүлийн 1 сар: 256004
Нийт хандалт: 9595489