Авсчин Адриан Прохоровынхан, шинэ байранд нүүж сүүлчийнхээ юмыг хүүр авс ачдаг тэргэндээ овоолоод, хоёр муу морь нь Басманы гудамжнаас Никитийн гудамж руу дөрөв дэх удаагаа гэлдэрчээ.
Авсчин, лангуугаа хаагаад тэр байшинг эзэн олдвол худалдана. Үгүй бол хөлсний хүн суулгана гэж зарлал хаалганд хадаад шинэ байр өөдөө гэлдэрлээ.
Аль хэдийнээс хорхой нь хүр хүрсээр арай ч гэж яггүй хатуу үнээр худалдаж авсан шаравтар байшин хашаандаа ойртож явтлаа сэтгэл нэг их баярлахгүй минь юу билээ гэж хөгшин авсчин гайхсаар хүрч ирээд, дасаагүй босгыг алхаж шинэ байрандаа ороод, төвхнөж амжаагүй, далан задгай, новшоор ноохролдож, байсныг үзмэгц, арван найман жилийн турш их нарийн дэглэмтэй байсан хуучин муу овоохой байшин нь санаанд нь орж, шүүрс алдлаа. Тэгээд хоёр охин зарц хүүхэн гурвыг юмаа далдалж чаддаггүй, нөсөр амьтан бэ гэж зэмлээд, элбэлцэн туслалцсаар, мөдхөн, жаал жуул төвхнөхчөөн боллоо...
