Толстойн олон бүтээлийн дотор «Сэхээрэлт» гэдэг роман том суурийг эзэлдэг юм. Толстой энэ романаа 1889 оноос 1899 оныг хүртэл бичжээ. «Сэхээрэлт» гэдэг романаа Орос оронд болсон хувьсгалт өрнөлтийн жилүүдэд бичжээ. Лев Толстой, хаант ёсыг эсэргүүцэхийн хамт хаант засгийн түшиг тулгуур болж байгаа хүнд сурталт харгис албан яамд, сүм хийд, шүүх таслах газар, гяндангуудын ангийн мөн чанарыг нэн тодоор үзүүлжээ. Ийм учраас «Сэхээрэлт» гэдэг романд Толстойн уудлан илрүүлэгч хүч нь хамгийн дээд шатандаа хүрсэн төдийгүй хоцрогдсон Орос орны олон сая тариачдын эрх ашгийг хамгаалагчийн хувьд зохиолч өөрийнхөө баримталдаг нийгэм улс төрийн үзлийг хурцаар харуулжээ.
Анх 1899 онд хэвлэгдсэн «Сэхээрэлт» роман шүүмжлэгч реализмын оргил болсон бөгөөд түүний нөлөөнд социалист реализмын зохиолууд соёолон цэцэглэсэн юм. Энэ учраас Лев Толстой бол Оросын утга зохиолын бүхэл бүтэн үеийн суут, гайхамшигт зохиолч юм.
«Сэхээрэлт» гэдэг роман 19 дүгээр зууны сүүлийн хорин таван жилийн хаант Оросын байдлыг үзүүлжээ. Энэ романд орсон хүмүүс нь нийгэмлэгийн янз бүрийн Давхаргын төлөөлөгчид юм. Л. Толстой энэ романдаа жирийн хүний олон төлөөлөгчийг оруулсан юм. Катюша Маслова энэ романы гол баатар нь юм. Энэ баатрын бүх түүх нь хөрөнгөт нийгэмлэгийн үзэл суртахууны түшиг суурийг уудлан илрүүлдэг юм. Романы өөр нэг баатар Нехлюдов бол «Сэхээрэлт» гэдэг романы доторх зовлонг биеэр амсагч хүн юм.
