Зохиолч: ПОЛЬ ДЕ КРАЙФ
Орчуулагч: Д. Дандий
Ангилал: Түүх Байгалийн шинжлэл Намтар, дурсамж Эрүүл мэнд, анагаах ухаан Америк уран зохиол
Хэвлэлийн газар: Улсын хэвлэлийн газар
Хүүхдийн амийг аварч сурахын төлөө энэ хоёр хүн хэчнээн олон усан гахайг хүйс тэмтрэн хядсан гэж санана аа!
Франц эрдэмтэн Пастерыг шүтэн дагагч түүний туслах Эмиль Ру 1889 онд багшийнхаа орхисон зэр зэвсгийг агсан босоод, биеэ даасан шинжилгээний ажилд орсон бөлгөө. Удалгүй тэр хүн дифтери хэмээх хоолойн сахуу өвчний нянгийн ялгаруулан гаргадаг аймшигт далд хорыг нээн олсон байнам. Энэхүү хорт бодисын нэгэн унцын төдий хэмжээтэй нь далан таван мянган гарз нохойг үхүүлэн чадах ажээ. Хэдэн жилийн дараа герман эрдэмтэн эмч Роберт Кох сүрьеэ өвчнийг бүтэлтэй эмнэж чадсангүй гэгдэж амьтны хараал идэж, бэрх доромжлуулан туйлдаж асан цагт түүний яруу найраглаг шавь Эмиль Беринг усан гахайн цусны хачин гайхамшигт шинж чанарыг нээн олжээ. Тэр цус сахуугийн хүчит хорыг хөнөөлгүй болгох эрдэмтэй ажээ. Сүрьеэлүүрийн талаарх Кохын эмгэнэлт явдлын дараагаар нэр нэгтэн энэ хоёр Эмиль нэг цагт аймшигт алуурчин нянгийн зүйлийг аюул хөнөөлгүй, арчаагүй бичил амьтан болгон хувиргах болов уу гэсэн найдлага хүний сэтгэл зүрхэнд дахин төрүүлж билээ...
