Зохиолч: ПОЛЬ ДЕ КРАЙФ
Орчуулагч: Ш. Гаадамба Д. Дандий
Ангилал: Түүх Эрүүл мэнд, анагаах ухаан Намтар, дурсамж Байгалийн шинжлэл Америк уран зохиол
Хэвлэлийн газар: Улсын хэвлэлийн газар
Хүлээвэл зохин гарцаагүй үнэн нэг зүйл гэвэл: Нянгийн ангуучдын их хүмүүсийн хүрээнд орох хүн нэг бүр нь нөгөө эрэлчинтэйгээ огт төсөөгүй хэдий боловч тэд цөм их л биеэ даасан улс байсан гэдэг нэг ерөнхий шинж төлөв бултад нь байжээ. Тэд цөм биеэ даасан өвөрмөц гойд улс. Харин Вальтер Рид л тийм биш байсан юм. Түүний бие XIX зууны сүүлчийн арван жилд агаар тэнгэрт өвчин тараагч хачиг, шумуул, бясаа тэргүүтэн элдэв шавж хорхой дэндүү олноор хуралдан бөөгнөрснийг ажиглаад ямар ч биеэ даасан гойд шинж илрүүлээгүй билээ. Хүн үүнийг анхаарсан нь тун зүй ёсны хэрэг. Тэгэвч Вальтер Рид нянгийн ангуучдын агуу их одон мичдийн дотроос туйлын нарийн чанд, билиг төгөлдөр туршин шинжигч хэвээр хоцрохын зэрэгцээгээр хамгийн эрхэм сайн зан суртахуунтай нь аргагүй мөн байсан. Тэгээд түүний сэтгэлийн шүншиг нь «Чи хүн төрөлхтнийг аврахын тулд хүн яргалах ёстой» гэж өгүүлсэнд түүний бие хаалттай нууц олон цуврал туршлагын төлөвлөгөө боловсруулах ажилд орсон бөгөөд сайн сэтгэлт хүний толгойд тийм аймаар, бөөлжис хутгам туршлага орсон удаа энэ ертөнцөд урьд хэзээ ч гараагүй аж...
