Зохиолч: Азиз Несин
Орчуулагч: Т. Содномдаржаа
Ангилал: Шог хошин турк уран зохиол
Хэвлэлийн газар: Улсын хэвлэлийн газар
Эдүгээ Люблиц хэмээх хотноо олон улсын мэс засалчдын их хурал хуралдав. Их хурлын ач холбогдлыг нийт даяар үнэлэх ажээ. Аравдугаар их хурал дэлхийн нэрт мэс засалчдын анхаарлыг татаж, хамгийн олон хүнтэй хурал болов. Сүүдэр шийн од хэмээн нэрийдэх гялалзсан хар, шар үстэй гоо сайхан хүүхнүүд өөрийнхөө авьяасыг үзүүлдэг хэвлэлийн бага хурал дээр юм уу, хөл бөмбөгний тэмцээн зэрэг онцгой явдал болоогүй ч гэсэн орон бүхний сонин сурвалжлагч нар тус их хуралд хүрэлцэн ирсэн ажгуу. Хорин гурван улсын нэрт мэс засалчид уул их хурал дээр эрдэм шинжилгээний илтгэл тавих ажээ. Тэдний дунд хүнийг цагийн механизм, автомат бууны нэгэн адилаар задлах юм уу эргүүлээд эвлүүлэхийг юман чинээ боддоггүй, ёстой л оройн чандмань болцгоосон тийм улс байв. Чухамхүү иймд бүх дэлхийн сонин усанд сэлэх сүүлчийн шинэ загварын хувцсыг хэрхэн шүүмжлэн хэлэлцсэн тухай, улс орны хөл бөмбөгчдийн тэргүүн багийг шалгаруулах тэмцээний дүнгийн тухай, ер бишийн гэмт хэргийн тухай, мэдээний дараа мэс засалчдын их хурлын тухай хэдэн мөр тавих нь зүйтэй хэмээн үзжээ...
