Зохиолч: ГЮЛА ИЛЛЕС
Орчуулагч: Булагад Ц. Сумъяа
Ангилал: Унгар уран зохиол
Хэвлэлийн газар: Улсын хэвлэлийн газар
Цаг агаар урин дулаан хэвээрээ л байлаа. Янагийн халуунд умбан, шөнө дүл болтол цэнгэг агаарт толгой нүцгэн, энгэр задгай зугаалан явах хос залуус лугаа адил, тэрхүү өдрийн хүйтнийг бид анзаараагүй ч байж болох агаад үнэндээ хорвоогийн жаргалын урхинаа орчихсон ч байж болох байлаа.
Гэтэл, гэв гэнэт тосгоны ойролцоо байдаг гол зайрмагтаж эхэллээ. Алс газраас аялах замдаа мөлийж мөлчийсөн том том мөснүүд хагарч бутран голын зах руу шавааралдан хахжээ. Капошварын ойролцоо хаа нэгэн газраас цийлгэр өнгөтэй голын уснаа өвөл айсуйн шинж ийнхүү сийлэгдсэн байлаа.
Өвлийг бид үүнээс арай өөр, нарлаг саруулхан, тавиун, жавхаалаг байх хэмээн санах бүлгээ.
Долоо хоног их цас орсны дараа, нэгэн өглөө тэнгэр бөртийх ч үүлгүй цэлмэж, наран авгай хэдэн өдөр дараалан зуны дунд сарыг санагдуулам хүчтэй ээсний улмаас нэвсийтэл дарсан цас хайлан толгодын бэлээс уруудан бууж царцаад гурван гацаа тосгон сууриныг арал мэт болгосон сүрлэг нэгэн тохиолдлоор өвөл эхлэв...
