Юунаас ч болсныг мэдэхгүй, Алексеич чулууныхаа тухай ярьж эхэлсэн юм.

— Одоо цагт бараг бүх үнэт эрдэнийн чулууг янз янзын юм хольж хайлгаж хийж сурчээ. Хувилгаан чулууг л чадахгүй байна. Маргад эрдэнэ жаалхан төвөгтэй бололтой, хайлгаж цутгаж байвч олигтой чадахгүй байгаа юм. Бусад чулууг ч сайхан хийж байна. Учрыг сайн мэдэхгүй хүн хайлгаж цутгасан чулууг ёстой чулуунаас ялгаж танихгүй байх шүү. Уурхайд ажил хийдэг, ялангуяа чулуу таллаж засдаг хүн ялгаж таних нь мэдээж хэрэг гэж ярилаа.

— Ялгаа нь юунд байдаг юм бэ? Хайлгаж цутгасан чулуу гэдгийг яаж ялгаж таних вэ? Үүнийг надад хэлж өгөөч гэж хүүхнүүдийн нэг нь асуусан юм.

Алексеич арга төрөө барж сууснаа:

— Нүдээр хараад ялгах боловч тайлбарлаж, ярьж өгч би чадахгүй. Бидэнд бол ил байдаг. Хайлгаж цутгасан чулуу ганцхан янз байдаг болохоор ядах зүдэх юмгүй, хэмжээг нь тааруулж чадвал болох тэр. Газраас ухаж авсан ёстой чулууг засахад аргагүй л ухаан хэрэгтэй байдаг. Аль талыг нь яаж засах вэ гэдгийг сайн бодох хэрэг гарна. Тэр чулууг эвийг нь олж, тааруулж цамцаалж чадвал урамтай байдаг. Ингэж зассан чулуу баяр баясгалан төрүүлдэг юм...