Сашка Ермолаевыг хүн гомдоожээ.
За яах вэ, гомдоовол гомдоогоо л биз тийм юм эс мундах биш. Яаж чиг гомдоож байсан, үг дуугүй хүлцэн өнгөрүүлж байхыг уриалсан хүн алга. Гэхдээ энэхэн зэргийн юмнаас болоод хүн төрөлхтний эрхэмлэн үздэг юм бүхнийг хянан өөрчилж, амьд явахын учир утгын асуудал босгож ирнэ гэдэг чинь... арай дэндэж байгаа хэрэг. Хар толгойдоо түвэг удахын нэмэр. Хэрсүү ухаан бол цөс ихтийн эдэлж хэрэглэдэг зүйл биш боловч хал бал багатай эд дээ. Тийм шүү. Та зөвшөөрнө үү, эсвэл хүлцэнгүйхэн инээмсэглэнэ үү, үгүй бол бүр эс тоомсорлон жуумалзана уу... Дураараа бологтун. Баахан омогдож сүр бадруулж яваад, олны ад болж хөөгдөж туугдаад, цөхрөнгөө барсан цагт мань мэтийн хэрсүү ухаантан дээр ирж цай уугаарай л даа.
За хэлэх гэснээ хэлье...
