Шүүхийн иргэний төлөөлөгч агсны бэлэвсэн гэргий, балчир хүү Игнатийн хамт амь зуулга сайтай хоцорч хамаг ухаанаа хүүгийнхээ хүмүүжилд зарж, салхинд цохиулах, өвчин тусахаас хамгаалж, бас элдэв муу юмнаас хүүхдийн ухаан санаа эвдэрч мэднэ хэмээн элдэв яриа, эвгүй муу үгээс ч хаацайлдаг байлаа. Ингээд үүргийн худалдаачин, талхчин хоёроос өөр хэнийг ч, ганц ч эр хүнийг гэрээрээ шагайлгахгүй, гагцхүү ном мөргөлийнх нь багш Павел ламтан л сар бүрийн шинийн нэгэнд тэднийхээр орно...
