«Мөнгө» романы үндсэн гол санаа нь бол францын ялзран задарч байгаа хоёрдугаар империйн үеийн дамын худалдаа, санхүүгийн олигархийн балмад явуулга хэмжээ танаггүй болж байгааг хурц тод, нарийн эрэмбэтэй өгүүлсэн байдаг. Санхүү банкны эзэд мөнгөний төлөө улангасан хөөцөлдөж буйг энэ романд зохиогч яруу эвлэг харуулж байна.

Улс төрийн үзэл бодол, депутатын хэлэх үг, сэтгүүлчийн үзэг ер нь бүх юмыг мөнгөөр худалдан авдгийг зохиогч «Мөнгө» романдаа ихэд утга учир гүнзгий гаргасан юм. Банк санхүүгийн том хөрөнгөтнүүд аж үйлдвэр, соёл, шинжлэх ухаан, төрийн эрх энэ бүхнийг яаж залгин эзэгнэж байгаатай уншигч та бүхэн танилцах болно.

Эмиль Золя «Мөнгө» гэдэг романдаа үйлдвэр банкны эздийн хоорондын ширүүн тэмцэл, инженер ажилчны хувь заяа тэдний хөөрхийлөлтэй хайр дурлал, мөнгөнд хэрхэн нам цохиулж байгааг үлэмжийн мэдлэгтэй бүх талаас нь гарган бичжээ.

Эцсийн бүлэгт, балран унасан банкны уршгаар үгүйрэн хоосорч байгаа олон хүнтэй уншигчид учрах болно оо. Ер нь романыг уншсаны эцэс сүүлд хөрөнгөтний нийгэмлэг өмхийрөн задарч эхэлж байгааг харуулжээ гэсэн дүгнэлтэд хүргэнэ.

«Мөнгө» гэдэг роман бол амьдралын үнэнийг сэтгэлд шингэцтэй зурсан реалист зохиолын нэг мөн.

 Хэвлэлийн газар