Должин зовлонгоо тоочин ярихыг Жамц сонсож суухдаа залуу зандан цагийнх шигээ түүнийг өрөвдөн хайрлаж, Малзавт зэвүү нь хүрч, байлаа. Гэвч тэр тухайгаа ганц ч үг цухуйлгасангүй. Айл гэрийн аж төрөл, тэр тусмаа эр эмийн хоорондын явдалд тэр бээр хутгалдах дургүй ажээ. Хүү нь үнэхээр өр төлбөрт унаад ял заалган шийтгүүлэх дээрээ хүрч, үрийнхээ төлөө Должин уйлж унжиж сэтгэлийн тамаа цайлгаж суусан бол Жамц хадгаламжид байгаа мөнгөнөөсөө хэчнээн хэрэгтэйг нь авч ирээд өгөх байлаа. Хожим төлж чадахгүй гэж цааргалсан ч хамаагүй өр төлөөснөөс нь салгаж, Должинг сэтгэлийн зовлонгоос ангижруулсандаа санаа амар буцаад явах байсан аж. Тэгтэл эцэг хүү хоёрт хатуурхан хир загнасандаа гэмшиж, Должингийн төлөө сэтгэл зовон өөртөө бухимдаж, отрын малаа айлд орхиод ирсний эцэст дахиад л учир битүүлэг явдалтай тулгарчээ.

Үнэхээр арга ягдаагүй бол Малзав харанхуй шөнөөр тэмтчин очиж, миний өмнө хормой дэвсээд мөргөх шахан мөнгө гуйх хүн биш сэн. Хүүгийнхээ данс харааг буруу зөрүү бодож төлж баршгүй өр төлбөрт уналаа гэж сандарч тэвдээд л очсон хэрэг юм болов уу. Ай хөөрхий, бүү мэд. Ямар ч байсан Должинд л мэдэгдсэн юм алга. Өр төлбөрт уналаа ч гэсэн Малзав төлчих бэл бэнчинтэй нь үнэн байж таарна. Наад зах нь насаараа шахам дарга даамал хийж цалин мөнгө ахиу түлхүү авч байсан хүн эрх биш цааш нь далд хийсэн нэлээд юм байгаа. Должингийн ярьдаг ч үнэн. Нэгдэлжих хөдөлгөөн эхлэх сургаар сээхэлзүүр Думаагийн нөхөр зартай панзчин Дэрдэвтэй хүзүү сээрээрээ тэврэлдээд амнаасаа архи дарс шимэлцэх дөхөөд л сүжирмээр байсан даа...