Энэ сургаал нь түүхэн бодит нөхцөл бүрэлдсэний улмаас өөрөөр хэлбэл тухайн үеийн бодит шаардлага гарсны учир зохиогдсон гэдгийг анхаарвал зохино. Манжийн 160 гаруй жилийн эзэрхлийн балгаар тэр цагт ард олон, албат харьяатынх нь аж ахуй нэн бууран доройтсон нь феодал эздийг аж төрөх асуудалд эрхбиш анхаарахад хүргэсэн хэрэг юм. Нэгэнт аж ахуй нь бууран доройтох замд орсон бол хулгай дээрэм олшрох, зарга тэмцэл өрнөх, шашин суртлаа шүүмжлэх, сүсэг алдах мэт нийгэм, улс төр, үзэл суртлын зөрчил хурцдах нь зүйн ёсны үзэгдэл болно. Энэ шаардлагаас үүдэн зөвхөн То ван биш бусад зарим ноёд, Улиастайн жанжин нар ухуулах бичиг зохион гаргах, Манжийн хаан зарлиг, хожуухан үед Богдын Лүндэн буулгах мэтээр ард олныг ухуулан сэнхрүүлэх, ятган номхруулах, тэдэнд санаа тавьж зөвлөн учирласан дүр үзүүлэх нь нэлээд байсан хэрэг. То вангийн сургаал бол үүний нэг болно.
