Зохиолч: О. Хенри
Орчуулагч: Л. ДАШНЯМ
Ангилал: Америк уран зохиол
Хэвлэлийн газар: Улсын хэвлэлийн газар
Соупи явж явж, хөл шуугиангүй алслагдсан нэгэн гудамж хүрч, Медисон цэцэрлэг рүүгээ зүглэв. Хэдийгээр орон гэр нь цэцэрлэг дэх нэг муу урт сандал ч гэлээ тийш тэмүүлэх совин мэдрэхүй хүнд хэзээ ч үлддэг ажээ.
Гэтэл нэгэн онцгой чимээгүй буланд Соупи зогсов. Тэнд шовгор оройт хуучин сүм байдаг юм санжээ. Нэг цонхных нь яргуйн өнгөт шилний чанад бүдэг гэрэл ёлтолзоно. Соупийн чихэнд хөгжмийн яруу сайхан эгшиг дуурьсан, тэр халхавч ширмэн тор түшин нам гүм болчихсоныг бодоход, орган хөгжимчин бүтэн сайны дуулал дарж байсан болов уу.
Амгалан, гэрэлт саран мэлтийж, тэрэгтэй хөлхөгсөд ховор, дээврийн ирмэгт нойрмог бор шувууд дуугаран, хөдөөгийн оршуулгын газар ирсэн лүгээ адил санагдана.
Хөгжимчний тоглож буй сүмийн дууллыг сонсоод Соупи ширмэн тор налан анир чимээгүй болсон нь учиртай бүлгээ...
