Зохиолч: КОНСТАНТИН СИМОНОВ
Орчуулагч: Д. Жамсран Жодов
Ангилал: Түүх Оросын уран зохиол
Хэвлэлийн газар: цэргийн хэвлэл
Монгол улсад гэнэт дайран довтолж, Улаанбаатарыг түргэн эзэлж аваад төрийн эргэлт хийж, Манжид байгуулсан эзэн хаан Пу—И тэргүүтэй хаант улсын нэг адил хаант засгийг Монголд байгуулахаар япончууд төлөвлөж байсан хугацаанаас долоо хоногийн өмнө 1937 оны есдүгээр сарын эхээр Зөвлөлтийн танкны бригадыг Чита хотын тэндээс Монголд ирүүлсэн байжээ.
Монголын засгийн газар, Япончуудын төлөвлөгөөний тухай мэдээ хүлээж аваад, харилцан туслалцах гэрээний ёсоор Монголын нутагт улаан армийн цэргүүдийг ирүүлэхийг Зөвлөлт засгийн газарт хүссэн билээ. Тэр үед, Японы довтолгоог няцаахаар Монголд ирсэн Зөвлөлтийн цэргийн ангиудын нэг нь Климович алба хааж байгаа танкны бригад байжээ. Япончууд тэр үед довтолгоо хийж чадсангүй, учир нь тэр Зөвлөлтийн цэрэгтэй тулгарна гэж бодоогүй, зөвхөн л Монголын армитай байлдахаар төлөвлөж байжээ. Ингээд Зөвлөлтийн цэрэг Монголд ирж, байдал өөр болоход Япончууд хүчээ бага гэж үзээд жил өнгөрсний дараа 1938 онд Хасан нуурын тэртээ, Владивосток хотын дэргэд хүчээ үзэлцэх гэж оролдсон билээ.
Энэ 1939 оны зун юу болохыг урьдчилж хэлэхэд хэцүү байлаа. Юу ч гэсэн танкны бригад бүтэн хагас жилийн турш ямагт бэлэн бэлтгэлтэй байсан бөгөөд хэзээ ч гэсэн, хаа ч гэсэн хөдлөхөд бэлэн байв...
