Зохиолч: В. Г. БЕЛИНСКИЙ
Орчуулагч: Э. Чинбат
Ангилал: Оросын уран зохиол Шүүмж
Хэвлэлийн газар: Улсын хэвлэлийн газар
Орчин үед бүх юмыг, тэр ч бүү хэл шүүмжлэлийг хүртэл шүүмжлэх хэрэгтэй байна. Бидний энэ үе ямар ч зүйлийг шууд хүлээн авахгүй бөгөөд нэр хүндтэй хүмүүст итгэдэггүй, үлгэр домог шиг юмыг үгүйсгэдэг болоод байна. Гэвч энэ үе маань оршин тогтнох бүхий л хугацаандаа бүтээн байгуулахын оронд зөвхөн эвдэлж, сүйтгэж чаддаг байсан өнгөрсөн зууны маягаар биш, харин итгэл үнэмшлээр гачигдаж, үнэн мөний өлсгөлөнд ороод байна. Та бидний үе аливаа бодит санаа бодлыг тусган авч, биетэй баримттай зүйлийг бишрэн шүтэхэд бэлэн байгаа боловч, тэр бүхнийг яаран тосохын оронд тэвчээртэй тайвнаар, адгаж яарч, шохоорхолгүйгээр хүсэн хүлээж байна. Урам хугарахаас айж байгаа шигээ бас яаран сандран баясан хөөрцөглөхөөс эмээж байна...
