Эрт цагт зургаан зүйл хамаг амьтан эх болсон илэрхий зөөлөн авирт илтэд хурдан тонилгогч Ногоон Дар эх Янжин сүмд Дүнжин гарвийн хийдэд арван наснаас далан долоон нас хүртэл хатуужил даяаныг бясалган суув.
Даяаны үндсийг бясалган дүүргээд зургаан зүйл хамаг амьтны эх болсон илэрхий зөвлөн авирт, илтэд хурдан тонилгогч Ногоон Дар эх дээд сайн цагийн мянган бурхан, Шагжамуни бурхан, Очирваань бурхан, Огторгуйн түмэн хуврагуудын оронд дээш нисэн өөд болов.
Мянган бурхны орныг гурван үе эргэж мөргөөд
— Би Янжин сүмд арван наснаас далан долоон нас хүртэл хатуужил даяаныг бясалган суув. Урьдах маань холдож, хойдох маань ойртож буй энэ цагт цор ганцаар тул надад нэгэн үр заяа хэмээн хутаг гуйсанд сайн цагийн мянган бурхан зургаан сайн эмийг адислан өгөв.
Тэр эмийг зооглосны сүүлд ерэн есөн насан дээр нь Очирвааниас үндэстэй ургамал наран мэт өнгөтэй улаан тоорын өнгөт уруултай өндөр Бяруузана мэт тэгш сайхан биетэй хас эрдэнэ мэт шүдтэй галбарбаасан мод мэт нуруутай бодитой бурхан дүртэй Оюу нэртэй бодисадва хөвүүн төрөв...
