ДЕКАМЕРОНЫ ТАВ ДАХЬ ӨДӨР ДУУСАЖ ЗУРГАА ДАХЬ ӨДӨР ЭХЭЛЖ БАЙНА

НЭГ : Нэгэн тайж Донна Ореттад зам зуураа сонин сайхан туурь ярьж өгнө, тэгээд мориор явж байгаа юм шиг нэг мэдэх нь ээ зорьсон газраа хүрсэн байх болно гэжээ. Тэр тайжийг юм ярихдаа маруухан болохоор нь Донна Оретта мориноосоо буулгаж өгнө үү хэмээн хүсэв.

ХОЁР : Талхчин Чистийн хэлсэн хэдэн үг мессер Жери Спинийн нүдийг нээж, талхчнаас даруу биш юм хүссэнийг нь мэдүүлэв.

ГУРАВ : Монна Нонна де Пульчи тун зохимжгүй тоглоом тохуу хийх гэсэн Флоренцийн их хамбад онож хэлсэн овжин үгээр хариу тавьж амыг нь таглав.

ДӨРӨВ : Куррадо Жанфильяццийн тогооч Кикибио өөрийгөө аврахын тулд овжин хариу олж хэлснээр хилэгнэн догширсон Куррадогийн инээдийг хүргэж, өөрт учирсан ярвигтай байдлаас мултарч чадав.

ТАВ : Мессер Форезе да Рабатта, уран зураач Жотто нар Мужеллоос буцаж явлаа. Хоёул даанч өрөвдмөөр байдалтай байсан агаад үүнээс болж бие биеэ элэглэн уран үгийг уралдуулжээ.

ЗУРГАА : Микеле Скальца залуустай Барончи нарыг зөвхөн энэ дэлхийд төдийгүй, тэнгисийн хөвөө нутаг даяар хамгийн сурвалжит язгууртан хүмүүс гэж мөрийцөөд бооцоогоо авчээ.

ДОЛОО : Донна Филиппийг нууц амрагтайгаа байхад нөхөр нь барьж авлаа. Шүүх дээр Донна Филиппа овсгоотой хурц мэргэн хариу өгсний ачаар ял шийтгэлээс мултарч, хуулийг өөрчлөхийн баримт нотлол гаргаж өгчээ.

НАЙМ : Фреско зээ охиноо хэрэв царай муутай хүнийг хараад ой гутдаг чинь үнэн бол битгий тольдож бай гэж зөвлөв.

ЕС : Гвидо Кавальканти өөрийгөө гэнэдүүлэх гэсэн Флоренцийн тайж нарыг хоргүй хошигнож буй байдлаар дайран доромжлов.

АРАВ : Чиполла ламтан тариачдад Гавриил тэнгэрийн өдийг үзүүлнэ гэж амлав. Өд байсан хайрцагт нүүрс байхыг үзээд энэ бол дээр нь Лаврентий хутагтыг хайлсан нүүрс лаваар мөн хэмээн батлав.