Урьд нэгэн цагт
Нар сая мандаж байхад
Навч цэцэг сая дэлгэрч байхад
Зүүн тивийг эзлэн төрсөн
Зоовой Мижид хааны
Зуувай Мижид хүү гэж
Нэгэн сайн эр байв л гэнэ.
Тэр хүүгийн нутагладаг
Нутаг газрыг асуувал
Өндөр уулын энгэрт
Өргөн талын захад
Талын чинээ дагаан
Өргөөтэй юм л гэнэ.
Суудаг өргөөг нь асуувал
Цагаан мөнгөн дээвэртэй
Цалин мөнгөн туургатай
Хүнд мөнгөн чагтагатай
Хүрэл эрдэнэ тоонотой
Ум зандан уньтай
Ухаа зандан ханатай
Хар зандан хаалгатай
Хаш чулуун довжоотой
Халзан хамбан дэвсгэртэй
Хатгамал хоргой хөшигтэй
Алтан хөвөөтэй хаяавчтай
Амьд могой бүслүүртэй
Ийм сайхан өргөө л гэнэ...
