Данпатрай Шривастав
(1880-1936)
Премчанд хэмээн алдаршсан энэтхэгийн зохиолч, нийтлэлч байв.
Премчанд хинди-урдү хэлээр бүтээл туурвиж, сургуульд багшилж байв. Энэтхэгийн хойгийн орчин үеийн уран зохиолын гол төлөөлөгч болсон. 13 роман, 40 өгүүлэл, олон нийтлэл бичсэн нь дэлхийн олон хэлнээ орчуулагдан хүрсэн.
Дэлгэрэнгүйг Wiki-гээс
БРЕМ ЧАНД (1880—1936)
Энэтхэгийн нэрт зохиолч Брем Чанд Энэтхэгийн Марваа гэдэг бяцхан тосгонд тариачны гэрт төрсөн учир ядуу зүдүүгийн зовлонг багаасаа амсжээ. Төрүүлсэн эх нь балчир ахуйд нь нас барсан тул хойд эхийн гар дээр халуунд халж, хүйтэнд хөрж хүн болжээ. Тэр төрөлх тосгондоо дунд сургууль төгсөж, улмаар Баранасы хотын дээд сургуулийн бэлтгэл курст суралцжээ. Эцэг нь нас барсан учир хойд эхээ тэжээн гэр орныг нь авч явах үүрэг хариуцлага арга буюу тохогдсон байна. Хичээл сургуульд явахынхаа зэрэгцээгээр тэр баян өмгөөлөгчийн эрх хүүхдэд сардаа таван рүпийн хөлстэйгөөр гэрийн хичээл заадаг болжээ.
Амьдралын гачаал зовлон дундуур Б. Чанд мятралгүй зүтгэсээр хагас дээд боловсрол олж аваад хэд хэдэн сургуульд багш, захирал хийж байснаа өөрийгөө «колоничлогчдод тусалж байгаа хэрэг байна» хэмээн үзээд ажлаа орхижээ. Ингээд хөдөө тосгондоо очиж тариачны дэрсэн овоохойд сууж дан ганц уран зохиолын мөр хөөв. Анхны өгүүллэгээ 1901 онд сэтгүүлд хэвлэгдэн гарсныг үзээд урам зориг орсон Б. Чанд хэд хэдэн өгүүллэг, бас «Санаа сэтгэлийн уналт» гэдэг анхныхаа роман бичиж уншигч олонд хүргэжээ. Тэгтэл уг романыг харгис засгийн газар хураан авч шатаагаад, зохиолчийг мөрдөж эхэлсэн байна. Гэвч хавчлага мөрдлөг зохиолчийн билиг авьяасыг мохоосонгүй. Удалгүй хоёр дахь роман нь «Хүмүүжлийн ордон» гэдэг нэртэй гарав. Энэхүү романаараа нийгмийн дарлагдлаас болж дууч эмс болж байгаа хинд охидыг өмгөөлөн хамгаалж, түүнээс гарах арга замыг нь эрэн хайжээ.
Билиг авьяаст зохиолчийг Раажистаны хаан өөрийн ордны шүлэгч болгох гэж олон мянган рүпийн цалин пүнлүү, тэр ч байтугай албат иргэдийн хамт амлан урьсан боловч, «Үгүй ээ, би очихгүй таны тансаг ордонд очихоор миний үг гарахаа болино. Би тэнд хэнийгээ харж, хэнийгээ бичиж суух билээ» гэж хэлсэн гэдэг.
Түүний уран бүтээлийн өв санд «Тангараг», «Өглөг», «Халуун ертөнц», «Нирмала бүсгүй», «Ядуугийн зовлон» зэрэг хориод роман, «Хүний сэтгэл», «Эхийн сэтгэл», «Шатарчин» зэрэг гурван зуугаад өгүүллэг, тав зургаан жүжиг, «Уран зохиол ба зохиогч», «Уран зохиол ба нийгэм», «Романы агуулга», «Өгүүллэгийн тухай өгүүлэл» гэх зэрэг уран зохиолын онол судлалын хэд хэдэн зохиол ордог юм.
«Ядуугийн зовлон» гэдэг роман бол Брем Чандын бүтээлийн оргилд тооцогддог бөгөөд энэ зохиолдоо хөдөөд феодалын эзний харьцаа ноёрхож, хотод хөрөнгөт ёсны харьцаа тогтон байгаа тийм нийгмийн байдлыг дүрсэлжээ.
Түүний «Хүний сэтгэл», «Согтуурал», «Эхийн сэтгэл» зэрэг өгүүллэг, «Ядуугийн зовлон», «Нирмала бүсгүй» гэдэг романууд нь хинд хэлнээс орчуулагдаж манай уншигчдын хүртээл болжээ.
Эх сурвалж : "Хүүхэд залуучуудын нэвтэрхий толь - 3" (1988 он)
