Зохиолч: Жюль Верн
Орчуулагч: С. Жамъян Ц. Батцэвэл
Ангилал: Францын уран зохиол Адал явдалт уран зөгнөл
Хэвлэлийн газар:
Энэ онгоц болбоос агаарын бөмбөрцөг шуурганд туугдаж колоничид энд хаягдаж хоцорсон тэр цагаас хойш өнгөрсөн хоёр жил хагасын дотор үргэлжид эл хуль байсан далай дээр эн түрүүн арлын бараанд үзэгдэж байгаа цор ганц хөлөг онгоц юм аа. Гэвч энэ онгоц эрэг дээр ирж зогсох уу, эс бөгөөс дэргэдүүр нь өнгөрөөд явчих уу? Энэ тухай зөвхөн нэлээд хэдэн цагийн дараа сая хариулж болох байлаа... Пенкроф дуран авайг шүүрэн авч алсад үзэгдэхийн төдий торолзон байгаа цэгийг гайгүй сайн ажиглан харж эхлэв. Тэгснээ
— Ай золиг! гэж дуу алдан, — Энэ үнэхээр нэгэн хөлөг онгоц байна! гэв.
Энэ нь хэдий сонин хачин зүйл боловч түүний дууны өнгөнд төдий л баярласан шинж байсангүй бүлгээ.
— Энэ онгоц тэгээд наашаа арал руу ирж явна уу? гэж Гедеон Спилетийг асуусанд,
— Одоохондоо юу ч хэлж мэдэхгүй байна. Далайн мандал дээр түүний их бие нь харагдахгүй зөвхөн ганц шураг нь цухуйж байна гэж далайч хариулав.
— Бид тэгээд яах вэ? гэж Гербертийн асуухад Сайрус Смит
— Хүлээе! гэж товчхон хариулав...
