Орчин үеийн суут бүтээл Манай орны эрхэм олон уншигч нарт дэлхийн сонгодог зохиолч Михаил Александрович Шолоховын даян дэлхийн бараг бүх оронд орчуулагдан хэвлэгдэж түгсэн бүтээл «Дөлгөөн Дон» хэмээх дөрвөн боть романыг уншиж эхлэхийн өмнө зохиолчийн тухай, түүний уран бүтээлийн гол утга санааны тухай цухас боловч танилцаасай гэдэг хүслийг удирдлага болгон энэ товч өгүүллийг бичив. Хориод оны дундуур Дон нутгийн нэрд гараагүй залуу зохиолч Михаил Шолоховын гарамгай бүтээл «Дөлгөөн Дон» романы эхний бүлгүүдийг анх уншиж танилцсан хүн бол тэр үед «Октябрь» сэтгүүлийн ерөнхий эрхлэгч агсан зөвлөлтийн нэрт зохиолч А. С. Серафимович байжээ. Тэрбээр нэг өдөр гадаадын зочид Анри Барбюс, Мартин Андерсен Нексе нарын зэрэг зохиолчдыг хүлээн авч уулзахдаа, номынхоо тавиур дээрээс товхгор зузаан хавтастай машиндмал эх бичгийг авч өргөж үзүүлээд: — Эрхэм нөхөд өө! Та нар «Дөлгөөн Дон» гэдэг энэ зохиолын нэрийг тогтоож аваарай. Зохиолчийн нэр нь Шолохов гэдэг... Миний бодож байгаагаар энэ зохиолчийн нэрийг удалгүй Орос орон даяар, хоёр гурван жилийн дараа дэлхий дахин ч мэдэх болно...» гэж баяртайгаар хэлж байжээ. А. С. Серафимовичийн тэр зөн билигтэй үг хэчнээн онч мэргэн байсныг амьдрал нотолж өглөө. М. А. Шолоховын урлан бүтээх суут авьяас нь түүний зохиолын эхний бүлгээс тодорхой харагдаж байжээ. Уншигчид Шолоховын тухай сонирхохдоо түүний урлан бүтээх гоц чадварын уг сурвалж нь чухам юунд оршиж байж вэ? Төрөлхийн тийм билгүүн авьяастай хүн юм уу? Эсхүл өөр ямар нэг увдис, учир шалтгаан байна уу? гэдэг асуултыг олонтоо тавьдаг. М. А. Шолоховын урлан бүтээх чадварын уг сурвалж нь гойд соргог авьяасаас гадна түүний туулж өнгөрүүлсэн их амьдралын сургууль: эх орон, нам, ард түмнээ эрхэмлэн үзэх гал халуун сэтгэл юм гэж хэлж болно. Үүнийг Зөвлөлтийн зохиолчдын II их хурал дээр: «Хилийн цаадах дайснууд зөвлөлтийн зохиолч бидэнд хорсож нүд үзүүрлэхдээ биднийг зохиолоо намын даалгавраар бичдэг мэтээр ярьдаг. Арай ч тийм бишээ. Бидний хэн маань ч сэтгэл зүрхнийхээ дуудлагаар бичдэг. Харин сэтгэл зүрх маань бидний урлагаараа үйлчлэх ёстой нам ба төрөлх ард түмэндээ зориулагдаж байдаг юм» гэсэн Михаил Шолоховын гүн утга санаа бүхий үг гэрчилж байв.