Зохиолч: М. Шолохов
Орчуулагч: Б. Дашцэрэн
Ангилал: Гадаадын уран зохиол
Хэвлэлийн газар: Улсын хэвлэлийн газар
Нөхөд цэргүүд ээ!
Лайтай хар дайн хоёр жил үргэлжилж байна. Та нар өөрсдөдөө харш эрх ашгийг хамгаалан хоёр жил нүх шуудуунд зовж зүдэрч байна. Үндэстэн бүрийн ажилчин, тариачдын цус хоёр жилийн турш урсаж байна. Олон зуун мянган хүн амь үрэгдэж, дутуу тахир болж, өнчирч бэлэвсэрсэн нь энэ яргаллын уршиг юм. Та нар юуны төлөө байлдаж байна вэ? Та нар хэний эрх ашгийг хамгаалж байна вэ? Хаант засаг шинэ газар нутаг эзлэн авч, тэдгээрийн хүн амыг боолчлогдсон польш зэрэг үндэстний нэгэн адил дарлахын тулд олон сая цэргийг бууны аманд барьж өгч байна. Дэлхийн аж үйлдвэрийн эзэд нь фабрик, заводынхоо бүтээгдэхүүнийг борлуулах зах зээл хийгээд ашиг хонжоогоо эв журмаар биш, зэвсгийн хүчээр хуваах гэж байхад мунхаг харанхуй та нар эдгээр үйлдвэрийн эздийн эрх ашгийг хамгаалах тэмцэлд үхэх сэхэхээ үзэлцэн, өөрсөдтэйгөө адилхан хөдөлмөрийн хүмүүсийг алж хядаж байна.
Ах дүү нарын цус мундахгүй их урслаа! Хөдөлмөрчид өө, эргэцүүлэн бодогтун!..
