ДУУЛАХАД БЭРХ АЮУЛТ ЯВДАЛ

Өнөө өглөө, гурван цагийн орчим, Сен-Рок хэмээх байрынхны энх амгалан нойрыг, дотор бачимдам хашхираан сочоожээ. Хавь ойрынхондоо, нөхөрт очоогүй Камилла охиныхоо хамт суудаг Л'Эспанэ гэгч авгайн байдаг, Моргын гудамжны нэгэн байшингийн дөрөвдүгээр давхраас зогсоо зайгүй хашхирсаар байлаа. Түгжсэн үүдийг оролдон түр саатсанаа царилаар эвдэн хоёр цагдаа айл хунарын өчнөөн хүнийг дагуулан хаалгаар оржээ. Орилох дуун нэгэнт зогссон байв. Хэдхэн зоригтон эр бусдаас тасран, ууртай дүнгэр дүнгэр ярьсаар дээш алхжээ. Гуравдугаар давхар хүрэнгүүт юу ч эс сонстох тул огт нам жим боллоо.

Хүмүүс байшингаар нэг өрөөнөөс нөгөө өрөө рүү гүйлдэв. Дөрөвдүгээр давхрын хашаа руугаа харсан унтлагын уужимхан өрөөнд (хаалга нь дотроосоо түгжээстэй тул эвдсэн) ороод тэд айж бачимдан айхавтар зүйлийг үзэж ухарсан байна.

Тэнд хамаг эд агуурсыг эргүүлэн сав суулгыг хэмхчин тал тал тийш нь шидэлжээ. Өрөөнд хөнжил дэвсгэргүй ганцхан ор байлаа. Хөнжил дэвсгэр, дэр нь шалаар нэг хөглөрчээ. Цус болсон, сахлын хутга сандал дээр үзэгдэв. Харваас угтай нь суга татаж, цусанд барилдсан, тун өтгөн хоёр гурван туг буурал үс, ханан зуухны ширмэн дээр наалдсан байлаа. Дөрвөн эрдэнийн чулуу, шигтгээтэй ээмэг, хоолны гур ван мөнгөн халбага, цайны гурван цагаан халбага, дөрвөн мянгаас багагүй алтан франктай хоёр жижиг уут шалан дээр байлаа. Буланд байгаа хайрцгийг цааш нь харуулсан байлаа. Үзтэл луйварчин ухсан боловч цөмийг авч амжаагүй нь илэрхий. Орны дороос биш гудас дороос төмөр хайрцаг гарч ирсэн нь онгорхой, түлхүүр нь цоожиндоо зүүгээтэй байв. Түүний дотор шарангуй өнгө орчихсон захиа, бас бус цаас чихчихээс өөр юу ч байсангүй.

Л'Эспанэ авгай хаана байгаа нь ер мэдэгдсэнгүй. Тэгтэл нэгэн хүн...