Зохиолч: А. П. Чехов
Орчуулагч: Б. Дэмчигдорж
Ангилал: Оросын уран зохиол Шог хошин
Хэвлэлийн газар:
Николаевын төмөр замын буудал дээр хоёр найз уулзсаны нэг нь бүдүүн, нөгөө нь нарийхан ажээ. Бүдүүн нь дөнгөж сая буудлын газар хооллосон учир, уруул нь тос болж боловсорч гүйцсэн интоор адил гялалзана. Түүнээс херес, флердоранжийн[1] үнэр ханхална. Нарийхан нь дөнгөж сая галт тэрэгнээс буугаад чемодан ваадантай бас хатуу цаасан хайрцагтай юм үүрчээ. Түүнээс гахайн утсан мах, кофе цайны шаар үнэртэнэ. Түүний ард урт эрүүтэй, туранхай авгай харагдах нь түүний эхнэр, бас гимназийн[2] өндөр сурагч нүдээ онийлгож харагдах нь түүний хүү ажээ.
— Порфирий! Чи чинь? Хонгор минь, хэчнээн ч жил уулзаагүй билээ! гэж бүдүүн нь нарийхнаа харж дуу алдав.
— Та минь! Миша! Багын найз минь! Хаанаас гараад ирэв ээ? гэж нарийхан нь гайхав...
