Зохиолч: Н. СМИРНОВ
Орчуулагч: Н. Пүрэвжав
Ангилал: Түүх Хууль, эрх зүй Оросын уран зохиол улс төр
Хэвлэлийн газар: Улсын хэвлэлийн газар
1925 оны нэгдүгээр сард Доод Ижлийн хязгаарын Ляпичево тосгонд Ф. А. Фунтиков гэгч баривчлагдлаа. Тэрээр тэнд 1922 оноос эхлэн суурьшиж, овоо томоохон, нэлээд цэгцтэй аж ахуй эрхэлдэг байв. Тэр хүн ойр хавийнхаа тариачдын дунд машин техник яггүй мэддэг гэж гайхагдана. Гэвч тэрээр 1918 оны долоодугаар сард английн түрэмгийлэн эзлэгч хүчний өдөөн хатгалгаар Каспийн чанадах мужаар зохион байгуулагдсан хувьсгалын эсэргүү үймээний толгойлогч, Ашхабадын 9, Бакугийн 26 комиссарыг буудан алах хэргийг зохион байгуулахад оролцогчдын нэг бөгөөд эсерүүдийн намын нэрт гишүүн асан Фунтиков байсан гэдгийг хөдөө тосгоны энэ бөглүү нутгийнхны хэн нь ч сэжиг авч чадаагүй ажээ.
Иймд Фунтиков сэтгэл тайван сууж, энд намайг хэн ч илчлэн олж чадахгүй гэдэгт итгэж байсан байна. Тэрээр шударга шийтгэлээс зугтан нуугдахдаа цуст гэмт хэрэг өдөөн явуулж байсан газрууд дахь ул мөрөө оргүй болгохыг үнэхээр хичээсэн байна. Каспийн чанад дахь түүний хамсаатнууд, Фунтиков бүр 1920 онд Ашхабадад буудан алуулсан гэдэг цуу тараажээ...
