Зохиолч: Х. Х. Андерсен
Орчуулагч: Б. Бааст
Ангилал: Хүүхдийн уран зохиол Гадаадын уран зохиол Үлгэр, домог
Хэвлэлийн газар: МОНГОЛЫН ЗОХИОЛЧДЫН ЭВЛЭЛ УЛСЫН ХЭВЛЭЛ
Эзэн хаан өөрийнхөө алтан ширээн дээр сууж номыг уншиж толгой дохин байв. Түүний нийслэл ямар сайхан, түүний орд харш цэцэрлэг хэчнээн гоё болох тухай уншихад түүнд тааламжтай байлаа. Тэгснээ эзэн хаан номын сүүлчийн хуудсан дээр уншсан нь:
"Хятадад гайхамшигтай юм маш их, гэвч тэр бүхнээс хамгийн сайхан нь эзэн хааны цэцэрлэгийн ойрх ойд байдаг алтан гургалдай гэдэг нэртэй жаахан шувуу юм. Түүний дуулахыг сонсохын тул хүн бүрийг Хятад руу аялан очицгоо гэж зөвлөе"
гэжээ.
— Юу гэнэ ээ? гэж эзэн хаан хэлэв. Эзэн хаан алтан ширээнээсээ босоод номоо хамхин тавив. Яана гэнэ ээ!? Миний улсад тэр байтугай миний өөрийн ордны хажууханд тийм гайхамшгийн шувуу байдаг байхад, би түүний дууг нэг ч удаа сонсоогүй байдаг! Тэгээд би бас түүний тухай очиж очиж харь холын хүний номоос олж мэддэг байна шүү!
Тэгээд хаан өөрийн нэгдүгээр сайдыг ирүүл гэжээ...
