НЭГДҮГЭЭР БҮЛЭГ : Сер Чаппеллетто бээр нүглээ хуурамчханаа наманчилж, нэгэн ариун явдалт гэлэнг мэхлээд үхжээ. Амьд насандаа өөдөлшгүй муу хүн бөгөөтөл үхсэний хойно ариун явдалтанд тооцогдож хутагт Чаппеллетто хэмээн алдаршвай.
ХОЁРДУГААР БҮЛЭГ : Нэгэн Авраам хэмээх еврей бээр Жианноттогийн ятгалгад орж, пап ламын суух Ром хотод одоод тэндэх лам нарын садар самууныг үзэж ихэд жигшин Парис хотод ирмэгц христосын номд оржээ.
ГУРАВДУГААР БҮЛЭГ : Нэгэн Мельхиседек хэмээх еврей бээр Саладин султанд гурван бөлзгийн үлгэр хэлж амиа гаргалаа.
ДӨРӨВДҮГЭЭР БҮЛЭГ : Нэгэн гэлэн, хүнд нүгэлд унаад мөн нүгэлд өөрийн хийдийн ширээт ламыг барьснаар ял гэсгээлтээс мултарч гарсан билээ.
ТАВДУГААР БҮЛЭГ : Монферратын бэйсийн хатан, эм тахианы махаар хийсэн идээн ба хэдхэн хөөрхөн үгээр Францын вангийн ухаангүй дурласан сэтгэлийг нь дарсан билээ.
ЗУРГААДУГААР БҮЛЭГ : Ямар нэгэн хүн хурц үгээр лам нарын засдаг хуурамч муу занг нь дуудвай.
ДОЛООДУГААР БҮЛЭГ : Бергамино гэгч нэгэн хүн, хамба (примас), ширээт Клюньи хоёрын тухай өгүүлээд урьхнаар Кане делла Скаллагийн ер бус харуу занг нь илрүүлжээ.
НАЙМДУГААР БҮЛЭГ : Гвильельмо Борсьере битүү ёгт үгээр Эрмино де Гримальди ноёны хэвцэг харууг зэмлэж буруушаавай.
ЕСДҮГЭЭР БҮЛЭГ : Киприйн ван нь Гасконы нэгэн хатагтайд дайрагдсанаас хойш үхээнц доройгоо гээж зоригтой чанга болсон бүлгээ.
АРАВДУГААР БҮЛЭГ : Болония хотын Альберто хэмээх нэгэн эрдэмтэн оточ, нэгэн бүсгүйд дурлавал тэр бүсгүй тийнхүү дурласан сэтгэлийг нь эш татаж нэг сайн мохоон ичээсүгэй гэсэнд эрдэмтэн багш аятайхнаар гэдрэг хариулан ичээж мохоосон байнам.
АРВАН НЭГДҮГЭЭР БҮЛЭГ : Мартеллино хэмээгч нэгэн хүн хуурамчаар тахир доголон болоод Арриго хутагтын шарилд мөргөснөөс сая эдгэв хэмээн цуурхал болгож байтал, ард олноор булхайг нь барьж нэвширтэл зодоод барилан авч хүзүүнээс дүүжлэн алахаар болсны эцэст арай чарай амь гарч билээ.
АРВАН ХОЁРДУГААР БҮЛЭГ : Ринальдо д'Асти хэмээгч нэгэн худалдаачин хулгайд хамаг юмаа автаад Кастель Гвильельмо гэдэг шилтгээнд хүрэлцэн очвол мөн шилтгээний нэгний бэлэвсэн хатагтай, түүний биеийг асарч тэнхрүүлээд, алдсан юмны оронд ханатал шагнасан учир их л урамтайгаар гэртээ эсэн мэнд буцаж ирсэн бүлгээ.
АРВАН ГУРАВДУГААР БҮЛЭГ : Вавилоны султан бээр өөрийн охиныг Гарбо ванд хүргүүлэн өгсөн нь хэд хэдэн цаг бусын учрал тохиолдож, дөрвөн жилийн турш олон газар есөн эрийн гарт орсон боловч эцэст нь эцэгтээ бүрэн бүтэн хүргэгдэн ирээд дахиж урьд тогтсон сүйн ёсоор Гарбо вангийн гэргий болон одсон бүлгээ.
АРВАН ДӨРӨВДҮГЭЭР БҮЛЭГ : Лампореккиогийн Мазетто бээр хэлгий мэт болж эмэгтэй гэлэн чавганц нарын орших хийдэд цэцгийн хүрээлэнгийн сахигч болж орвол эмэгтэй гэлэн бүгдээр үүн лүгээ нийлэхийн төлөө оролджээ.
АРВАН ТАВДУГААР БҮЛЭГ : Нэгэн хөлөгч бээр Агилульфа вангийн хатан лугаа унтвай. Агилульфа ван үүнийг битүүгээр мэдээд эрсээр олж үсийг нь хяргаж тэмдэг болгов. Хяргагдагч хөлөгч, бусад нөхдийнхөө үсийг нэгэн адил хяргаж орхисноор энэ зовлонгоос бултран гарчээ.
АРВАН ЗУРГААДУГААР БҮЛЭГ : Нэгэн хатагтай бээр нэгэн залуу хүнд дурлаад ямар нэгэн өвгөн гэлэнд нүглээ наманчилсугай хэмээн гэнэдүүлж зүрхнийхээ үнэн санааг илрүүлээд өөрийн хүссэнийг бүрнээ хангах арга олж билээ.
АРВАН ДОЛООДУГААР БҮЛЭГ : Тайж Феличе бээр Пуччьо увшийг залилж, хэрэв нэгэн зүйлийн наманчлал үйлдвэл сааргүй амгалант болъюу хэмээн үнэмшүүлэн тийнхүү хатуужилд оруулсан нь тэр завсар түүний гэргий лүгээ алиалан жаргалаа.
АРВАН НАЙМДУГААР БҮЛЭГ : Риччьярдо Минутоло хэмээгч нэгэн хүн Филиппелло Фигинольфи гэгчийн гэргийд дурлажээ. Үүний жөтөөчийг мэдээд өгүүлрүүн: Танай эр Филиппелло чинь маргааш шөнө миний гэргийтэй бие угаах халуун усны байшинд учрахаар болзжээ гэвэл төд тэр жөтөөч эм мөн халуун усны байшинд очиж эр юүгээн барив хэмээн санасан нь харин зальт Риччьярдо лугаа унтчихсан ажгуу.
АРВАН ЕСДҮГЭЭР БҮЛЭГ : Тедальдо бээр өөрийн амраг танхилтай эвдрэлцээд Флоренцээс зайлан одсон бөгөөд нэгэн хэсэг цаг өнгөрсний хойно гэдрэг мөргөлчний дүрээр ирж амраг лугаа үг хэлэлцсээр бурууг нь мэдрүүлсэн ба амины хэрэгт чирэгдсэн эрий нь амь авраад ах дүү нэртэй нь эвлэрүүлж зүй зохисоор түүний гэргийтэй амар сайхан жаргалаа.
ХОРЬДУГААР БҮЛЭГ : Ферондо бээр ямар нэгэн талхан эм уучхаад үхсэнд тооцогдож үхээрийн газар булагджээ. Нэгэнт аббат буюу ширээт лам бээр түүний гэргий лүгээ сэртэндэн явалдах бөгөөд булшнаас түүний биеийг гаргаад гянданд хийж, одоо чи хилэнцийг арилгагч зуурдын тамд унав хэмээн итгүүлжээ. Үхсэнээс босоод өнөө гайхал аббат ламын дархалж, өөрийн гэргийгээс төрсөн хөвүүнийг хүмүүжүүлэн байх бүлгээ.
ХОРИН НЭГДҮГЭЭР БҮЛЭГ : Алибек охин ертөнцийг тэвчиж аглаг цөлд гарч хатуужил хийв. Рустико хэмээх залуу бүтээлч лам бээр хэрхэн шуламсыг тамд намнан оруулах аргад сургавай.
ХОРИН ГУРАВДУГААР БҮЛЭГ : Альберт гэлэн бээр нэгэн эхнэрийг тэнгэр болон мэхэлж эвцэлдээд хэсэг зуур болсны хойно тэр эхнэрийн төрөл садны заналаас эмээж байшингийн цонхоор гадагш дутааж, нэгэн үгүйтэй ядуу хүний гэрт хоргодвол тэр хүн нь ламыг зэрлэг хүнээр хувцаслуулаад дараа өдөр олны цуглах зээлийн талбайд аваачиж түмний гайхал болгож үзүүлбэл бусад хүн тэр гэлэнг таньж, эхнэрийн ах дүү нар нь түүнийг шууд барилан авч гянданд хийж орхилоо.
ХОРИН ДӨРӨВДҮГЭЭР БҮЛЭГ : Нэг гурван залуу хөвүүн нэг гурван эгч дүүд амраглаад гурвуулыг хулуун авч Критэд оргов. Их эгч нь жөтөө хийж өөрийн амрагийг албай.
Хоёрдугаар охин нь Критийн бэйлд хэвтэж өгснөөр эгчийнхээ амийг цаазаар аваачихаас авартал харин өөрийн амрагт алагдвай. Энэ амраг нь аврагдагч эгчтэй нь хамт оргожээ. Энэ алаанд гуравдугаар дүүгийн амраг нь холболдож хоёулыг барилан авч эрүү хөдөлгөн байцаавал арга буюу гэмийг хүлээж, дараа нь алагдахаас айхдаа харуулын хүнд мөнгө өгч Родост оргон гарсан билээ. Үгээгүй хоосонд ороод ядарсаар үхэж гэнэм билээ.
ХОРИН ТАВДУГААР БҮЛЭГ : Гвильельмо Россильоне хэмээх нэгэн ноён бээр өөрийн гэргийн янагладаг нөгөө Гвильельмо Гвардастаньо хэмээх ноёныг алаад зүрхийг нь өөрийн гэргийд идүүлбэй. Гэргий нь учрыг мэдмэгц өндөр цонхоор үсрэн унаж үхлээ. Биеийг нь түүний амрагийн хамт нэгэн дор оршуулжээ.
ХОРИН ЗУРГААДУГААР БҮЛЭГ : Нэгэн их эмчийн гэргий нь согтох эм ууж үхэтхийн унтсан амрагийнхаа биеийг үнэхээр үхсэнд болгож авдар дотор хийгээд зайлуулан бөгөөтөл хоёр мөнгө хүүлэгч авдар хулгуухаар унтсан хүний хамт гэртээ аваачвай. Тэр амраг бээр нойрноос сэрээд хулгайд тоологдон баригдвай. Хатагтайн хөтөч охин заль хийж засгийн тамгын газар энэ хүн бол миний явалдах амраг бөгөөд би авдарт нуусан билээ. Мөнгө хүүлэгчид харин хулгайлан авчээ гэж мэдүүлбэл тэр хүнийг чагтагалан алах ял хэлтрүүлээд мөнгө хүүлэгчдийг авдар хулгуулсны ял торгон шийтгэлээ.