ДЕКАМЕРОНЫ ХОЁР ДАХЬ ӨДӨР ДУУСАЖ ГУРАВДАХ ӨДӨР ЭХЭЛЖ БАЙНА

Нейфилийн захиран засагласан эл өдөр хүн арга зальтайн ачаар маш их хүсэн мөрөөдөж байсан зүйлээ биелүүлж, эсвэл урьд алдсанаа эгүүлэн олж байгаа тухай туурийг толилуулна.

НЭГ : Лампореккьогийн Мазетто гэгч хэлгүй болж баашлан гэлэнмаа нарын хийдэд очиж цэцэрлэгч болсонд тэндхийн гэлэнмаа нар бүгд түүнтэй нөхцөх гэж өрсөлдөх болов.

ХОЁР : Агилульф вангийн нэгэн хөлөгч вангийнхаа хатантай хоножээ. Ван үүнийг битүүхэн мэдээд хөлөгчийг эрсээр олж, үсийг нь хяргаж тэмдэг болгов. Тэр хөлөгч бусад нөхдийнхөө үсийг нэгэн адил хяргаж орхисноор энэ зовлонгоос бултран гарчээ.

ГУРАВ : Нэгэн хатагтай нэгэн залуу хүнд дурлаад өвгөн гэлэнд нүглээ наманчлах дүр үзүүлэн өөрийн сэтгэлийн амрагт зүрхнийхээ үгийг дамжуулж, санаж сэдсэнээ гүйцэлдүүлэхэд тэр ариун явдалт гэлэнтнээр туслуулж билээ.

ДӨРӨВ : Дон Феличе гэгч Пуччо увшийг мэхлэн нэгэн зүйлийн наманчлал үйлдвэл энх амгалант болно хэмээн үнэмшүүлж, тийнхүү хатуужилд оруулаад тэр завсар гэргийтэй нь алиалан жаргажээ.

ТАВ : "Ганганхүү" аргамаг сайхан хүлгээ мессер Франческо Вержалезид бэлэглэж, хариуд нь түүний эхнэр лүгээ ярих зөвшөөрөл аваад гэргийг нь дуугарахгүй болохоор түүний өмнөөс өөрөө хариу хэлж, сүүлд нь тэр хоёрын бүх явдал яг “Ганганхүүгийн” хариулсанчлан болжээ.

ЗУРГАА : Риччардо Минутоло гэдэг хүн Филиппело Сигинольфо гэдэг хүний эхнэрт дурлаад тэр эхнэрийн жөтөөчийг мэдэж, танай нөхөр чинь маргааш халуун усны газар манай эхнэртэй уулзахаар болзжээ гэж хэлсэнд Филиппелын эхнэр тэнд очоод эр нөхрийгөө барив гэж бодсон нь харин Минутолотой унтчихсан байжээ.

ДОЛОО : Тедальдо өөрийн танхил амрагтай эвдрэлцээд Флоренцийг орхин одсоноо хэсэг хугацааны дараа мөргөлчний дүрээр эргэн ирж, амраг хүүхэнтэйгээ үг хэлэлцсээр бурууг нь ойлгуулж, хүн амины хэрэгт холбогдоод байсан эр нөхрийг нь аварч, түүнийг өөрийн ах дүү нартай эвлэрүүлээд зүй зохисыг харан гэргийтэй нь амраглан жаргах болов.

НАЙМ : Ферондод нойрны эм уулгаж, амьдаар нь оршуулав. Түүнийг булшнаас харанхуй гянданд аваачиж хориод хир хилэнцийг арилгах зуурдын тамд унасан чинь энэ хэмээн итгүүлжээ. Тэр завсар нэгэн ширээт лам түүний гэргий лүгээ алиалан наадсаар хөл хүндтэй болгожээ. Ферондо үхсэнээс босоод ширээтийн дархалсан хөвүүнийг асран хүмүүжүүлэх болов.

ЕС : Нарбонны Жилетта Францын эзэн вангийн шархыг эдгээж өгөөд шанд нь Руссильоны Бельтрантай суулгаж өгөхийг хүсэв. Бельтран сэтгэлгүй хүүхэнтэй нь богтлон суулгасанд хорсон зэвүүцэхдээ Флоренцид очжээ. Тэнд нэгэн бүсгүйн хойноос гүйх болж, түүнтэй хонолоо гэсэн нь Жилеттатай хоносон байв. Жилетта Бельтранд хоёр хөвүүн төрүүлэн өгч, үүнээс уламжлан хэсэг хугацааны дараа Бельтран түүнийг өөрийн эхнэр гэж хайрлан хүндэтгэх болжээ.

АРАВ : Алибек охин аглаг цөлд очиж хатуужил хийв. Рустико хэмээх залуу гэлэн хэрхэн шумныг тамд намнан оруулах аргыг түүнд зааж сургав. Алибек цөлөөс буцаж хариад Неербалтай ханилан суужээ.